Ինչպես նշել էինք նախորդ բլոգային գրառման մեջ, այս անգամ ներկայացնում ենք համառոտ մեդիա մոնիտորինգային վերլուծություն ևս 3 հայաստանյանբանկերի համար՝ ՎՏԲ-Հայաստան Բանկ, Արդշինբանկ, Անելիք Բանկ: RumorsMonitoring մեդիա մոնիտորինգային հարթակի օգնությամբ կփորձենք հասկանալ, թե հաշվետու ժամանակահատվածում հայկական օնլայն լրատվամիջոցներն ինչ ինտենսիվությամբ են անդրադարձել դիտարկվող 3 բանկերին:
Գրաֆիկից պարզ է դառնում, 2015թ. հունվար-օգոստոս ամիսների կտրվածքով ամենաշատ անդրադարձը եղել է ՎՏԲ-Հայաստան Բանկին՝ 68.14%-ով: Վերջինիս մասին ամենաշատը գրվել է ապրիլի 2-ին (21 հիշատակում), երբ բանկը հաղորդագրություն էր տարածել Ինտերնետ-բանկինգ համակարգով ավելի բարձր տոկոսադրույքով ավանդներ ներդնելու հնարավորության մասին:
Banks.am-ը, ներկայացնելով ՎՏԲ-Հայաստան Բանկի ընձեռած հնարավորությունը, գրել է. «Մասնավորապես, 2015թ. ապրիլի 1-ից հաճախորդի կողմից ՀՀ դրամով Ինտերնետ-բանկինգի միջոցով ավանդ ձևակերպելիս բանկում գործող տոկոսադրույքներին կգումարվի 0.25% արտոնյալ տոկոսադրույք: Ինտերնետ-բանկինգով ավանդ ներդնելու նվազագույն գումարը 10 հազ. դրամ է, իսկ առավելագույն տոկոսադրույքը`17.75%»:
Ըստ RumorsMonitoring-ի տվյալների՝ դիտարկվող բանկերից երկրորդ տեղում Անելիք Բանկն է՝ 20.14% ցուցանիշով: : Այս բանկին ամենաշատն անդրադարձել են ապրիլի 2-ին (7 հիշատակում), երբ բանկը թողարկել էր Visa Platinum պրեմիում դասի քարտատեսակ:
Արդշինբանկի շուրջ մեդիա ակտիվություն է գրանցվել ապրիլի 3-ին (11 հիշատակում), երբ բանկը և OPEC-ի միջազգային զարգացման հիմնադրամը ստորագրել էին $10 մլն-ի վարկային պայմանագիր:
«Վարկային միջոցները կուղղվեն փոքր և միջին ձեռնարկությունների կողմից փոքր հիդրոէլեկտրակայանների կառուցման և շահագործման ոլորտում իրականացվող նախագծերի ֆինանսավորմանը: Կողմերը սերտորեն համագործակցում են սկսած 2010 թվականից, և սույն պայմանագրի ստորագրմամբ համագործակցության ծավալը կկազմի 20 մլն ԱՄՆ դոլար»,- գրել է 168.am կայքը:
Ուշագրավ է, որ դիտարկվող 3 բանկերն առցանց լրատվամիջոցների ուշադրության կենտրոնում են հայտնվել գրեթե միևնույն ժամանակահատվածում՝ ՎՏԲ-Հայաստան Բանկի ու Անելիք Բանկի մասին ամենաշատը գրվել է ապրիլի 2-ին, իսկ Արդշինբանկի մասին՝ ապրիլի 3-ին:
Ստորև ներկայացված գրաֆիկից պարզ է դառնում, որ, օրինակ, ՎՏԲ-Հայաստան Բանկի մասին կայքերից ամենաշատը գրել են Armbanks.am-ը (17%), Arka.am-ը (14%), Banks.am-ը (11%), Arminfo.am-ը (10%), eBank.am-ը (8%): Տոկոսային հարաբերակցությամբ բանկին ամենաշատն անդրադարձել են մնացած կայքերը՝ միասին 40%:
Հիշեցնենք, որ այս նորարարական պլատֆորմի օգնությամբ դուք կարող եք վերահսկել ու վերլուծել ձեր ընկերության մասին հայտնվող ցանկացած տեղեկատվություն, ինչն իր հերթին կօգնի ձեզ մշակել ձեր բիզնեսի համար առավել արդյունավետ PR մարտավարություն:
Rumors Monitoring 